جيران كلبي

جيران گلبي
لاموني أعله ضيمي ..
المادروا بالضيم ..
واني لخاطرك ..
ما أنطي بأسرارك
وحسدوني عليك ........
واني كلي أجروح ..
ومتحمل لعينك ..
وجع بسمارك
لو بالخافي يدري اليعتب أعله الروح
چان أبعينه شاف ....
ابگلبي آثارك
تحملتك جرح .....
والون ، أون بسكوت ..
وفوگ الجرح هسه
اتطالب ابثارك !!؟
هاك الروح بيدك ..
وانت حر شتريد ..
سوي اللي تحسه ..
ايطفي الك نارك
معذور اني اعذرك ..
لأن گلبي وياك ..
خطوة .. بخطوة يمشي
ويعرف اخبارك
خطار آنه روحي .. واجت يمك ضيف ..
ماظن شيمتك تغدر بخطارك !!
تعرفني انت زين ..
وأكثر من الناس ..
احط روحي سعف ..
بس احمي جمارك
سوي اللي تريده ..
اشضل بعد بالروح ؟
مو روحي رهينه وباقية بدارك
تزعلني ، واحبك ، وانتشي بطرواك
وروحي اتذوب لهفه ..
امنسمع اشعارك
يا كلشي انت عندي
وكلشي انت وياي
عاين على جروحي ويكفي اعذارك
مو تدري الوصية
اتلوح .. سابع جار ...؟؟
يا جيران گلبي
شبيك وي جارك ..؟؟