ياعراق

السلام عليكم أحبابي الغالين

أقدم اليكم هذه القصيدة واتمنى ان تنال اعجابكم



كفكف دموعك حبيبي يا عراق
لسه دنيانه تضوي بنورك
ولو دم أولادك الطاهر يراق
وكلهه متحزمه تهدم سورك
ابتسم ... رغم الجروح الما تطاق
يا شهم وموفي كل انذورك
لا تظن يلووك شذاذ الافاق
لو يلوث ليلهم بلورك
انت نجمة صبح تسبح بالأحداق
الشمس ما تطلع إذا متشورك
انت كعبه.. للشرف مو للنفاق
جنة والطيبين كلهم حورك
والظمرلك سوء عاق وابن عاق
ولا عرف كدرك ولا مكدورك


غلط.. حسبوهه العرب حسبة رفاق
ما دروا دمك يريع ازهورك
ولا دروا جرحك يفز باشتياق
ويه كل هندس تهل أبدورك
شارتك تكتل حبيبي يا عراق
وكفر كلمن ما يجي ويزورك
اتحاشموا كلهم على ذبحك سباق
ابخيت كلمن شجخ سيفه بزورك
حسبوّا تتعب ... يدب بيك الإرهاق
..تموت.. وتكف عن غناها طيورك
ما دروا موتك حياة وانطلاق
ومن رمادك تفز تكمل دورك
انت عنقاء الزمان بلا فراق
والمجد يا بو الشرف ناعورك
كلهم يموتون.. وحدك أنت باق
لان سر الكون من اجذورك
حسبوا ليل التعصب والشقاق
يطفي شمسك.. لو ينشف هورك
واهمين الماقروا كل الأوراق
ألما دروا دمك يطيب بورك
ألما دروا غيضك ألك مهرة وبراق
أترخص الدنيه وتعز استورك
ما يعرفونك حبيبي يا عراق
ولو يعرفونك تكفوا جورك
لا تبالي وبالعزم شد الوثاق
وكل شريف به الشعب ناطورك
آه... وشكد مشتهي وياك العناق
امنين أبوسك سوربتني بنورك

تحياتي الدافئة مني لكم