حچيك دفو – قصائد حب للشاعر احمد عبد الجبار

ه
حچيك دفو و ضحكك جمر نار و شمس وكت الشته

عينك بحر . . تغري النظر باگت دليلي و هزّته

مشيك ردس . . ماخذ درس من الغزال و مشيته

إسمك دوه لاهل الهوى بين الجوانب كتبته

حن يا ترف و انت الولف . . روحي لجمالك حبّته

لا لا تصد وانت الورد . . بستان گلبي بدنيته

چان الزمن گبلك محن هسّـه ينور بزهرته

ما چنت أظن آنه الأون أحوى التمر من نخلته

بان الأمل فرحي اكتمل و اصبحت نوره و شمعته

يمي اگعدت و تسامرت من عمرك انت و قصّته

و شعرك يرف فوگ الچتف و گلبي يرف برفته

و حچيك دفو و ضحكك جمر نار و شمس وكت الشته

مرّ الوكت راح الوكت ما چنّه مر بجيته

و حسرة نهد تمضي و ترد و بنص دليلي شتلته

دمعة جفن تجري بحزن لامست خدي و لسعته

و توادعت گال و گلت محلاك يا ليل الشته


ولكم جزيل الشكر